Crita Rakyat Tegalan. "Manuk Tik Tik Tirrrr"

                                                                         Manuk Tir...Tir....Tir.....

Jaman biyen ana juragan sugih sing dodolane tekan njaba kutha malah anjog luar negeri. Juragan kiye arane Harun. Harun duwe anak siji wadon arane Milah. Bojone Harun wis setaun ninggal dunya. Dadi Milah kuwe bocah piatu.  Saben dinane sasuwene setaun kiye Milah urip mung loroan karo bapane tok

Sawijining dina wayahe pak Harun dodolan ngirim barang maring luar negeri.. Kaya biasane angger maring luar negri kuwe ora bisa sedelat, Pak Harun butuh waktu suwe kanggo nang dalan bolak balik toli kanggo dodolan. Lagi  bojone Pak Harun esih urip, pak Harun ora bingung ora keder angger ngepasi mangkat dodolan maring negeri liya soale nang umah ana bojone karo Milah. Tapi saiki bareng bojone wis ninggal, Pak Harun bingung. Angger Pak Harun mangkat terus mengko Milah nang umah karo sapa? Melas temen bocah wadon esih cilik ditinggal nang umah dhewekan, suwe sisan. Pak Harun watir, ora tega ninggalna Milah nang umah dhewekan.

“Pak….Bapak estu tindak sadean Pak?”   Milah takon alon maring bapane.

Pak Harun mung meneng mandeng anake wadon siji kuwe. Pak Harun lagi keder mikir, angger iya pancen sida mangkat dodolan nang luar negri  terus mengko Milah keprimen?

“Pak, menawi bapak tindak, terus mangke Milah kalih sinten?” Milah takon, tangane nyekel tangane bapane kenceng. Swarane alon, lirih kaya pan nangis. Raine katon surem radan mrengut mandeng bapane. Mripate ngecembeng banyu luh kaya pan nangis nemen.

Pak Harun ora tega ndelengna praupane Milah. Atine kaya diiris-iris, nggrentes. Sakleyangan kelingan bojone ya ibune Milah kuwe.

Pak Harun ngelus rambute Milah, rasa sayange sing ora bisa diukur ndadekna abot ninggalna Milah dhewekan.

“Nok, bapak ya lagi mikirna kuwe,” Pak Harun meneng sedelat, katon lagi mikir nggolet omongan sing gampang dingerteni dening Milah.

“Angger...bapak nggolet ibu maning  kanggo ngancani Milah nang kene, pime?”

 “Milah ora papa?”  pak harun takon alon, watir  bokan Milah nolak.

 Milah mandeng bapane ora kedep. Kaya-kaya lagi mikir. Let ora suwe Milah semaur.

“Ibu…kanggo Milah pak?” Milah semaur, radan kaget.

Pak Harun manthuk alon, “Pime nok ayu, dadi mengko sasuwene bapak tindak Milah nang umah ana kancane. Ana sing masakna.”

Milah mbayangna nang umah ana ibune….Milah seneng. Dadi Milah mesem karo semaur,”Inggih pak, Milah purun.”

Krungu semaure Milah pak Harun krasa lega atine. Kaya-kaya beban anteb sing nindih dadane kuwe keangkat. Pak Harun narik awake Milah luwih perek, dikekepi karo dielus-elus sirahe.

“Pak, kapan ibu teka pak?” Milah takon karo mandeng bapane.

“Sabar Milah, bapak kudu marani dhisit, takon. Ndonga bae ya muga-muga ora ana alangan eben  ibu kanggo kowen bisa cepet nang kene ngancani Milah. Dadi bapak ya bisa ayem olih mangkat dodolan.” Pak Harun ngomong alon karo ngusap-usap Milah.

“Inggih pak.” Semaure Milah.

“Ngko sore bapak pan maring desa sebelah, nemoni wong kuwe. Milah ora papa ya ditinggal bapak sedelat.” Pak Harun ngomong karo mandeng kebek tresna asih maring MIlah,  tangan lorone nyekeli pundake Milah.

“Inggih  pak.” Milah manthuk.

Sorene pak Harun lunga maring desa sebelah marani wong wadon sing pan didadekna ibu kanggo ngancani Milah. Wong wadon kuwe wis randa, sing lanange ninggal dunya. Wong wadon kuwe duwe anak wadon siji saumuran karo Milah.

Pak Harun anjog nang umahe randa kuwe. Pak Harun gagian nothok lawang umahe wong wadon kuwe.

“Tok-tok-tok…” swara lawang umah gubug diketok dening pak Harun.

“Kraaak…kriyeeet…kraaak! swara lawang papan dibuka. Katon wong wadon kumel nang lawang, mandeng pak Harun. Praupane katon bingung karo  kaget.

“Assalamu alaikum buk….”  pak Harun uluk salam.

“Wa…waalaikumsalam…” wong wadon kuwe semaur, omongane  tugel-pedhot-pedhot saking bingunge.

Pak Harun diaturi mlebu nang gubuge. Sawise nang njero pak Harun langsung ngomong tujuane teka mono. Wong wadon kuwe sing jebul arane Kedasih ora langsung semaur nyanggupi.

“Aku duwe anak wadon siji, apa pak Harun gelem nampa anak wadonku, apa olih anakku melu sisan nang pak Harun?”

“Olih orapapa, malah kebeneran sisan bisa kanggo kancane anaku.” Semaure pak Harun.

Esuke sawise diresmikake dadi bojone, dening pak Harun Kedasih karo anak wadone dijak mairng umahe pak Harun, dikenalna maring Milah.

“Milah, kenalna kiye ibu kanggo Milah, arane bu Kedasih.”

Milah salaman karo bu Kedasih, tangane bu Kedasih diambung kaya sing diajari daning ibu biyen lagi esih urip. dadi bocah kudu  sopan, ngajeni ngormati wong sing luwih tua.

Pak Harun mesem seneng atine nyekseni anake wadon sing  ayu, budi pekertine apik.

“Nah kiye anake bu Kedasih, arane Watir,” pak Harun toli  ngenalna anake bu Kedasih maring Milah.

Milah mandeng maring Watir, bocah wadon saumuran Milah, tapi jelas katon beda nemen karo Milah. Milah bersih, resik, klambine ya apik resik. Watir, kucel, crumut klambine ya badheg.

“Milah ayo gagian Watir dijak mlebu, kon adus, terus ganti klambi. Toli wong bapak durung sempet tuku klambi nggo Watir ya, disilihi dhist klambine Milah, ya nok ayu.” Pak Harun ngandhani Milah alon.

“Inggih pak.” Milah gagian mlebu kamare, bareng metu maning wis nggawa satumpuk klambi anyar. Pak harun kaget. "Milah kuwe kan klambi anyare Milah sing wingi bapak tuku.”

“Inggih pak.” Semaure Milah.

     “Toli kuwe pan wekena Watir?” Pak Harun esih ora percaya meruhi kelakuane Milah.

“Inggih Pak.” Milah semaur mantep ora ragu-ragu.

“Milah ora papa Nok ayu, milah ikhlas?” Pak Harun takon kanggo negesna maning.

“Inggih pak, Milah ikhlas.” Semare Milah mantep.

Pak harun kemembeng mripate saking senenge atine meruhi yen anak wadon yakuwe Milah temenanan duwe ati sing apik.

“Alhamdulillah ya Allah… maturnuwun Milah, bapak seneng Milah anake bapak duwe ati welas asih. Tetep dadi bocah sing budi pekertine luhur ya nok ayu…sing akeh syukure maring Gusti Allah, welas asih maring sapepadha ya nok ayu.” Pak Harun ngelus elus sirahe Mirah. rasa emane maring Milah wis por-poran nemen. Praupane pak Harun katon padhang.

“Ngesuk bapak tuku maning klambi anyar kanggo Milah kanggo gantine sing kuwe ya, sisan tuku kanggo Watir karo  ibu.”

 

        Gelising crita, pak Harun sida mangkat dodol maring negeri manca. Nang umah Milah ora dhewekan soale  wis ana bu Kedasih karo Watir. Milah karo Watir cepet akrab. Klambi karo barang-barang liyane dekeni Milah disilihna maring Watir. Tapi…..suwe-suwe Watir krasa ora marem. Watir duweni kepenginan apa bae sing dadi dekene Milah kudu dadi dekene Watir.  Watir iri maring Milah sing anggo-anggone serba  apik, bersih, larang. Mas-masane ya lengkap ana gelang, kalung toli tindhik. Watir tanpa tedheng aling-aling langsung ngomong maring Milah.

“Milah aku ya kepengin nganggo emas-emasan sing kaya kowen nganggo kuwe. Pime angger kuwe nggo aku bae.” ora nganggo isin-isin Watir njaluk barange Milah.

Milah bingung krungu omongane Watir sing kaya kuwe. Milah mikir, akhire …..

“Watir, kiye tinggalane ibune aku, ora bisa takwekena maring kowen.” Milah nolak.

Krungu semaure Milah sing nolak, Watir mrengut karo gejuk sikil, mripate kaya pan nangis.

Bocah loro regejegan, rebutan omong, tukaran. Watir kekeh karo kepenginane. Watir pan gemboran ngundang ibune yakuwe Kedasih, tapi langsung di andeg dipenging  dening Milah. Milah emoh ngko ibune Watir dadi sewot jengkelen. 

“Ya  wis angger kowen pengin nganggo…..” Milah meneng sedhelat karo ndelengna Watir.

“Ehm….pime angger gentian bae nganggone. Angger esuk nganti awan dinggo aku terus ngko sore nganti esuk sawengi nutug dinggo kowen Watir, Milah nawani Watir. Watir mikir sedhelat terus akhire  manthuk setuju.

Mulai dina kuwe Milah karo Watir gentian manganggo kabeh emas-emasane Milah.

Sasuwene pak Harun dodol nang negeri manca, Milah urip bareng saumah karo Watir toli bu Kedasih. Kelakuane karo panampane Minah  apik, nerima, ikhlas toli ya seneng. Bu Kedasih wis dianggep kaya ibune dhewek dening Milah.  Pak Harun ya kaya kuwe padha bae apike kelakuane.  Ora pilih kasih ora mbedak-mbedakna. Bareng Bu Kedasih dadi bojone Pak Harun, uripe bu Kedasih karo Watir dadi kepenak. Uripe ora susah ora rekasa maning. Sing maune bu Kedasih karo Watir manggoni umah gubug, saiki wong loro kuwe manggoni umah gedhe apik magrong-magrong yakuwe umahe Pak Harun lan Milah. Klambine bu Kedasih karo Watir ya saiki anyar-anyar, apik-apik ora kucel ora kusem. Kabeh kuwe diwenehi ditukokna dening pak Harun karo Milah. Tapi  sipate manungsa kuwe ora kabeh manungsa apik. Contone ya bu Kedasih karo Watir anake bu Kedasih kuwe.

 Tanpa dinyana bu Kedasih ya nduweni niat ora apik. Bu Kedasih kepengin kabeh sing di duweni dening Milah dadi dekene. Pengin ngukuhi kabeh hartane pak Harun supaya mung kanggo dheweke karo Watir. Bu Kedasih mulai nyusun rencana kanggo mujudake kepenginan alane kuwe. Rencana wis digawe temenan, mumpung pak Harun lagi dodol nang negeri manca, dadi ora bakal ana sing ngalangi kelakuane. Ora bakal ana sing ngonangi, kaya kuwe pikire Kedasih.

Bengi kuwe ngepasi Milah karo Watir turu bareng sakamar sakasur. Lorone turu lali nemen. Bu Kedasih niat pan nglaksanakna rencana ngilangna Milah kanggo salawase.

Ngerti Milah karo Watir wis lali turune, bu Kedasih gagian marani bocah loro kuwe nang kamare.

 (Jaman biyen kuwe durung ana listrik, dadi angger bengi ya mung remeng-remeng. Apa maning angger wayahe turu, damare dipateni dadi pancen bener-bener peteng).

Bareng wis nang kamar, bu Kedasih alon-alon nggrayangi bocah loro kanggo mestekna endi Milah endi Watir. Bocah pertama dimek, digrayangi kupinge….eh laka tindhike. Tangane Kedasih pindah maring gulune….laka kalunge, geser maning maring ugel-ugel tangane..laka gelange….bareng ngerti sing digrayangi kuwe laka emas-emasane….langsung….gepppp…..cangkepe dibekem dening Kedasih, terus diangkat digotong digawa maring mburi umah, nang buri umah bocah wadon sing di gotong kuwe langsung diceblungna nang blumbangan sing wis disiapna dening Kedasih. Bar kuwe langsung diurug nganggo lemah dikubur.

                  Esuke, Kedasih tangi turu praupane katon sumringah seneng. Bu Kedasih masak gawe sarapan karo mesam-mesem. Atine seneng soale rumangsa wis kasil ngilangna Milah. Nang njero pikirane Kedasih, “Hartane pak Harun bakal dikukuhi kabeh. Kedasih karo Watir bakal urip seneng.”

Ora krasa masake wis rampung, gagian Kedasih ngundang anake yakuwe Watir.

“Watir…watir…nok ayu…tangi nok. Kiye ibu masak sarapan enak. Istimewa. Ayo nok… tangi.”

Water diundang undang ora metu-metu. Malah jebul sing metu…

“Bu…Watir sih nang ndi? Daning  ora nggugah Milah sih?” Milah takon maring Bu Kedasih.

Sapira kagete Bu Kedasih bareng meruhi jebul sing marani yakuwe Milah, dudu Watir, anake.

Bu Kedasih ngadeg, mendelik, ndregdeg sikile, pikirane ngelingi kelakuane mau bengi. “Berarti….berarti……sing dikubur…..”

“Wattirrrr…………” bu Kedasih langsung mlayu maring buri umah karo njerit seru ngaru ara memelas, atine gela getun  sing ora ana tandingane.

“Watirrr…..Watirrr……..”

Bu Kedasih nglambruk nang ndhuwure kuburane Watir, bu Kedasih nangis karo ngundang-undang arane anake. Olihe ngundag-ngundang memelas nemen. Wiwit kuwe nganti dina-dina esuke bu Kedasih terus kaya kuwe. Ora mingsar ora mingser, ora mangan ora adus, ora turu. Wis ora kepengin apa-apa. Ora emut apa-apa. Suwe-suwe awake Kedasih tambah mengkeret. Tambah cilik tambah cilik, akhire dadi ireng cilik.. Swarane sing ngundang-undang arane Watir  terus bae muni.

“Watirrr….tirrr….tir…….” swarane keprungu nggrentes, kebek gela, getun, malah kaya-kaya ndadekna mrinding wong sing krungu. Suwene suwe Bu Kedasih sing tambah cilkik ireng kuwe malih wujud dadi manuk, yakuwe manuk Kedasih. Swara manuk Kedasih  tir….tirr….tir……nganti saiki dirungokna rasane kok ndadekna sesek nang dada.

Kuwe akibate wong sing serakah, ora nrimakna, ora bersyukur. Mulane dadi menungsa sing akeh syukure maring Gusti Allah. Urip ya sederhana bae. Welas asih maring sapepadhane. Gelem tulung tinulung.

Sumber pustaka, Cerita Rakyat Kabupaten Tegal, Lembaga Pengkajian dan Pengembangan Bahasa Tegal. Seri 5. 

Diceritakan ulang  dan diterjemahkan dalam bahasa Tegal oleh jengais.